Diskursu husi S. E. Prezidente Taur Matan Ruak

 

 

Exelénsias,
Povo doben Timor Leste nia oan tomak:


Uluk nanain ha’u nia hakoak boot ba imi hotu no povu Timor Leste nia oan tomak, iha serimónia ne’ebé ita selebra tinan 37 dezde proklamasaun independénsia no tinan atus ida dezde Liurai Dom Boaventura mate.

Ha’u nia hakoak mos ba Manufahi nia oan sira hotu, iha Dom Boaventura no proklamador Xavier do Amaral nia rain, no hato’o hau nia obrigadu ba imi hotu tanba imi nia laran-luak no laran-kmanek hodi simu ita-nia bainaka sira hotu, tanto nasionál no internasionál, ne’ebé partisipa ho laran kmanek iha loron no fatin especial ida ne’e.

Ha’u laran-ksolok tebes, tanba ba dala uluk, ita selebra 28 Novembru iha distritu ida i la’os iha Dili. Ba dala uluk mós, katuas lian-na’in husi distritu 13 hola parte iha komemorasaun ida ne’e hodi Nahe Biti Boot ho tema: Haluha Pasadu, Hateke ba Futuru. Ha’u hato’o saudasaun espesial ba lian-na’in sira no haksolok tebes ho Ita-Boot sira nia prezensa hodi ita hamutuk hateke ba Timor-Leste ninia futuru no futuru ita tomak nian.


Ita selebra daudaun akontesimentu importante ida iha ita nia Istória ke iha ligasaun ho dezemvolvimentu no formasaun identidade nasaun Timor-Leste nian.

La kleur, ita sei selebra mos tinan atus lima ne’ebé ba dala uluk Timoroan no Portugés sira hasoru malu, i hahú husi ne’ebá misionáriu portugés sira komesa fahe fiar cristaun iha bei’ala sira nia leet.
Kontaktu durante tempu naruk ho Portugál no Portugés sira, ita nia identidade hahú buras liu tan husi Fiar Cristaun no Lian Portugés.

Lian Portugés hametin relasaun Timoroan sira nian no família povu maun-alin sira, ne’ebé fó sira-nia amizade no apoiu internasionál ba ita luta ba libertasaun. Liu tiha restaurasaun independénsia, sira kontinua akompaña no apoia ita hodi harii ita-nia Estadu. Ha’u hato’o saudasaun especial ida ba Xefe-Estadu husi nasaun ida CPLP nian, señor Prezidente Jorge Fonseca, husi Kabu Verde, ne’ebé fó onra ba ita hodi hi’it an mai Same, hamutuk iha komemorasaun ida nee.
Ita hanoin Liurai Dom Boaventura nia luta kontra podér koloniál. Dom Boaventura nia luta, maske sai dezafiu boot kontra administrasaun koloniál, la hetan konsensu husi reinu sira, no iha realidade sai nu’udar hakat ba dala uluk iha ida ne’ebé sai naruk tebes.


Aspirasaun ba liberdade iha ita-nia sosiedade la mate ho Dom Boaventura, no ita-nia jerasaun maka hetan knaar lulik ida ne’e, hodi ikusmai, halo mehi ida ne’e sai duni realidade.


Iha 1974, lideransa Fretilin nian mai iha ne’e vizita no rona Dom Boaventura nia feto-faluk – gesto ida ne’ebé hatudu liurai ne’e ninia hanoin no kbiit, tinan neenulu-resin-rua liutiha nia mate.

Konta katak Dom Boaventura nia feto-faluk, ne’ebé ferik loos ona, dehan ba vizitante sira iha 1974 katak “loriku sira lian filafali ona”, no ida ne’e signifika esperansa no ksolok ne’ebé moris hi’as iha timoroan sira-nia laran tanba nasionalizmu foun.


Iha realidade, ita tenke funu tan iha tinan 24 nia laran atu loriku sira bele lian iha liberdade nia laran. Maibé iha funu ida ne’e, unidade ita nian buras no metin liu. Lori tinan 24 Funu hodi hetan buat ida ne’ebé ita hetan tiha ona, lori tinan 24 mak manán fila-fali ita-nia independénsia. Kondekorasaun ba saudozu Nicolau Lobato ho títulu póstumu i no Ordem Dom Boaventura nu’udar omenajen ba ninia lideransa no inspirasaun ne’ebé nia representa, ba gerasaun ita hotu nian no sira ne’ebé sei tuir mai iha loron ikus.


Iha 2002, ita hamutuk hahú projetu nasionál foun ida, no husik ona ba kotuk naksalak sira uluk nian.
Ita manán ita-nia independénsia tanba ita aprende hametin ita-nia unidade. Hanesan uluk ha’u dehan tiha ona no dehan beibeik, husi ita-nia istória no ha’u-nia esperiénsia rasik iha funu, aprende lisaun katak fahe malu entre timoroan sira fasilita okupasaun, tanto iha Bei’ala sira nia tempu no mos tempu ita nian. Unidade ita nian lori ita ba vitória, mezmu kuandu ema hotu-hotu kontra ita. Timor-Leste manán tanba determinasaun no unidade ninia povu nian.


Restaurasaun ita nia independénsia, tinan 10 liubá, loke dalan ba rekonsiliasaun, moris husi aktu demokrátiku ida – referendu 1999, ne’ebé mai husi vontade forte no sakrifísiu ita nia povu nian.
Pás ne’ebé ita hetan no hametin, rekonsiliasaun nasionál ne’ebé ita hala’o, esensiál tebes atu hametin estabilidade no konsege hetan objetivus dezenvolvimentu nian. Buat sira ne’e hotu indispensavel tebes ba prosesu integrasaun Timor-Leste nian iha Comunidade Internasional nia leet.

Timor-Leste, nu’udar demokrasia foun ne’ebé mosu iha sékulu XXI, konsegue ho susesu integra nia an iha rejiaun no mundo.
Ita-nia polítika ba rekonsiliasaun fo kbiit mos ba ita, atu harii, dezde hahú, relasaun viziñansa di’ak, amizade no kooperasaun ho nasaun sira iha rejiaun, inklui viziñu sira ne’ebé besik liu ita.


Ita harii tiha ona relasaun metin ho Indonézia no Austrália, iha nivel bilaterál no multilaterál, ne’ebé kontribui atu reforsa seguransa no estabilidade rejionál no atu kombate no prevene kriminalidade tranznasionál iha ita-nia rejiaun.
Ita iha relasaun bilaterál ne’ebé dinámiku ho viziñu sira hotu ASEAN nian, liuliu Filipinas, Malázia, Tailándia no Singapura. Ita hakarak hakle’an tan ita-nia relasaun ho rejiaun, liuhusi ita-nia adesaun ba ASEAN.

Restaurasaun independénsia haluan tan kooperasaun ho nasaun maun-alin sira CPLP nian, organizasaun ne’ebé Timor-Leste sei iha onra hodi prezide no lidera iha tinan 2014-16.


Ita iha relasaun forte no metin ho Xina no Estadus Unidus – ne’ebé Sekretária Estadu Srª Hillary Clinton, fó onra ba Timor-Leste iha tinan ida ne’e ho ninia vizita; no mós ho Japaun, Repúblika Koreia, Nova Zelándia, Brazíl, Kuba, Portugál, Irlandia, Uniaun Europeia no Estadu sira seluk ne’ebé halo parte. Dala ida tan, ha’u hato’o parabéns ba Uniaun Europeia tanba simu, iha tinan ida ne’e, Prémiu Nobel Pás nian.


Prémiu Nobel hanesan rekonhesimentu ida ba buat ne’ebé Uniaun Europeia halo – no husi Komunidade husi Europa, ne’ebé iha uluk – hodi dezenvolve kooperasaun pasífika entre estadu sira no hodi harii, durante tinan neenulu ikus ne’e, zona seguransa no moris di’ak iha Europa, ne’ebé uluk laiha, ne’ebé iha impaktu pozitivu tebes iha relasaun internasionál tomak.


Ha’u hakarak manifesta ha’u-nia rekoñesimentu ba nasaun sira husi Europa no ba parseiru dezenvolvimentu selseluk ne’ebé uluk kontribui tiha ona ka sei kontribui nafatin atu hala’o dezenvolvimentu iha ita-nia rain, liuhusi Nasoins Unidas, PNUD no ajénsia internasionál sira seluk no mos iha nivel bilaterál.
Timor-Leste no Nasoins Unidas estabelese parseria ida ne’ebé di’ak tebes. Ha’u hahi’i señór Finn Reske Nielsen, reprezentante interinu Sekretáriu-Jerál Ban Ki-moon nian, no funsionáriu sira UNMIT liuliu ba buat ne’ebé halo ona, atu retirada Missaun ONU nian, bele hetan susesu.
Kooperasaun ho Nasoins Unidas sei kontinua, ho forma foun, ne’ebé sei adapta ba situasaun dame no estabilidade ne’ebé ita alkansa ona i sei konsentra liuliu atu hametin instituisaun Estado nian no dezenvolvimentu ekonómiku.

Exelénsias,
Povu doben Timor-Leste nian:

Unidade ita nian, uluk sai nu’udar kondisaun estratéjiku ida ba vitória no ba restaurasaun ita-nia Independénsia Nacional. Ohin, unidade kontinua nu’udar kondisaun estratéjiku ida ba ita atu hetan susesu iha ita-nia objetivu nasionál atu harii futuru ida kmanek ba ita no ita rain.


Uluk ita funu atu hetan seguransa no moris di’ak ba timor-oan sira. Agora, tempu to’o ona atu fó signifikadu tomak ba independénsia ne’ebé ita hetan, atu garante seguransa no moris di’ak, ita presiza servisu maka’as no la para atu dezenvolve ita-nia rain.


Timor-Leste iha rekursu barak. Maibé atu aproveita rekurso sira-ne’e no halo ita-nia nasaun sai rain ida ne’ebé seguru no prósperu liután, ita sei presiza unidade no servisu maka’as. Hanesan uluk ha’u dehan bainhira simu knaar nu’udar Prezidente, buat ne’ebé natureza fó ba ita tenke rega ho kosar-been no esforsu. Uluk, vitória ezije fakar raan no ita-nia luta. Agora, Vitória ezije husi ita hotu, kosar been suli no badinas atu servisu. I atu manán iha luta foun ida ne’e, ita presiza tempu, unidade iha hanoin no hahalok i servisu maka’as husi ita hotu.
Knaar ne’ebé iha ita-nia oin sei la mosu prontu derrepente de’it se ema la book an. Sidadaun hotu-hotu tenke kontribui.
Estadu tenke hadi’ak ho urjénsia ita-nia eskola sira. Maibé se família sira la mobiliza an atu apoia labarik sira-nia edukasaun, rezultado sei la mosu.
Estadu haluan dadaun rede ba kuidadu saúde nian. Iha 2013, ita sei iha médiku timoroan kuaze rihun ida ne’ebé serbisu iha território nasionál tomak. Maibé, se família sira la mobiliza an ita sei la hamenus susuk, nén bele garante katak uma sira no ambiente iha aldeia sira moos, hodi hamenus moras no hadi’ak populasaun nia saúde.

Investimentu iha agrikultura nasionál, atu bele aumenta produsaun, konserva no rai ai-han ho diak, no fa’an produtu Timór-oan sira nian, hodi hamosu seguransa ai-han iha ita-nia rain no hamenus dependénsia ekonómiku husi rai seluk. Mas para bele hetan resultadu di’ak, investimentu sira ne’ebé ita halo tenke hetan mos partisipasaun agrikultór sira nian.


Ita-nia dezenvolvimentu ezije ita fó atensaun liuliu ba zona sira ne’ebé servisu Estadu nian seidauk to’o bá. Ita tenke investe hodi kria polu dezenvolvimentu iha fatin-fatin, atu hamosu empregu no habiit ekonomia lokál. Estrada sira tenke sai di’ak liu tan. Ita tenke servisu hodi lori mai iha distritu sira: infraestrutura hirak-ne’ebé iha kualidade, bee ho saneamentu, eletrisidade, internet, eskola sira ne’ebé di’ak liu.

Só mobilizasaun no partisipasaun sidadaun no komunidade lokál sira tomak nian, mak bele ajuda atu asegura katak investimentu ne’ebé halo implementa duni ho di’ak, infraestrutura no servisu sira ne’ebé Estadu halo povu bele aproveita.
Partisipasaun sidadaun sira nian importante tebes atu haboot ekonomia setór privadu ne’ebé ho kbit atu loke servisu ne’ebé ita-nia rain presiza tebes.


Foin-sa’e sira, veteranu sira, no grupu selseluk ne’ebé iha kondisaun atu sai ativu no badinas liu tan seidauk integra an tomak iha ekonomia nasionál. Sira-nia partisipasaun importante tebes ba ita-nia dezenvolvimentu.
Povu labele tuur hodi hateke de’it dezenvolvimentu nasaun nian. Povu tenke sai autór no responsável iha prosesu dezenvolvimentu hodi serbí komunidade sira.


Atu mobiliza sidadaun no sosiedade sivíl sira ita presiza justisa. Ita tenke aproveita didiak rekursus nasaun nian hodi fahe rikusoin ho diak no hanesan.


Atu manán, hodi iha seguransa no moris di’ak, ita tenke servisu ho onestidade no hala’o ita-nia moris ho simplisidade. Ita tenke respeita valór tradisionál sira, nune’e mos ita tenke hatene aproveita vantajen husi matenek foun siénsia no teknolojia nian atu dezenvolve ita-nia nasaun no hadi’ak ita-nia moris.


Husu atu ita hotu servisu hamutuk no ho laran, badinas no sakrifika an liu tan, atu ita bele uza ho di’ak rikusoin ne’ebé ita nia Nasaun iha atu dezenvolve di’ak liu tan ita-nia ekonomia, hamenus kiak no hari Nasaun ida ne’ebé hakmatek no moris diak.
Maromak haraik bensaun ba povu Timor-Lesye tomak no mos ita sira ne’ebé hamutuk iha fatin ida ne’e. Obrigadu barak.

 

Fonte: Presidência da República de Timor-Leste

Foto: Lusa@ António Amaral