Funu Manufahi nia no Independénsia país nia - Husi Hercus dos Santos

 

Istória kolonizasaun europeu sira-nia iha mundu hahú ho motivu tolu ne’ebé importante: evenzelizasaun, komérsiu no poder. Motivu tolu ne’e hanesan “motor” ne’ebé dudu navegadór sira hodi deskobre rai foun sira no mundu sira foun. Hanesan époka deskobrimentu sira-nia.


Espíritu deskobrimentu sira-nia rasik hanesan rezultadu husi époka importante ne’ebé mundu europeu atravesa. Ita ko’alia kona-bá Renasimentu. Períudu ida ne’ebé marka Idade Médiu nia rohan no inísiu ba Idade Modernu nia. Altura ida ne’ebé europeu sira hahú dezenvolve arte foun sira, siénsia sira no filozofia sira. Époka ida ne’ebé iha ézitu maka’as iha área sientífiku, arte no filozofia ne’ebé permiti ba europeu sira hodi iha vizaun foun mundu nia no permiti hahú deskobrimentu sira no to’o mós iha Timor.


Maski iha Timor iha ona komérsiu izoladu ida ho xinés sira, ligasaun ida ho reinu Majapahit nia no mós europeu balun to’o uluk iha ne’ebá. Maibé, misionáriu dominikanu sira sai hanesan portugés sira ba dala uluk maka hela no estabelese kontaktu sira ho liurai sira lokál nia. Misionáriu sira funsiona hanesan ponte ligasaun ida entre monarkia portugés no liurai lokál sira. Sira, aleinde sarani reinu prinsipál no populasaun sira, serve hanesan administradór portugés sira-nia iha teritóriu Timor nia. Iha tinan 1562, Frei António da Cruz haruka harii fortaleza iha Solor, edifísiu ne’ebé funsiona hanesan sinál inísiu husi domíniu kolonizasaun portugés nia iha illa Timor.

Kolonizasaun portugés, hanesan kolonizasaun seluk iha mundu, lori buat balun ne’ebé di’ak no balun ne’ebé ladún di’ak. Iha kolonizasaun portugés maka fortalese lejitimidade ezisténsia país ida ho naran Timor-Leste. Timoroan na’in rua ne’ebé simu Prémiu Nobel Pás nia, Dom Ximenes Belo no Dr. José Ramos Horta defende iha públiku ideia ida-ne’e. Dom Ximenes Belo iha préfasiu ba ia livru hateten katak “Bainhira iha pasadu Liurai hotu konsege hasai Portugés sira, Timor sei sai parte domíniu husi Olandés sira no ikus mai, sei halo parte Indonézia nia”.
Enkuantu Dr. Ramos Horta iha entrevista ho Cristina Buarque hateten katak “tanba kolonizasaun portugés nia maka moris nasaun ne’ebé ho naran Timor-Leste. Bainhira laiha kolonizasaun portugés, ita la hatene Timor-Leste ohin loron sai hanusa. Bele sai indonéziu, bele sai olandés, bele sai australianu”.

Parte negativu kolonizasaun nia maka sofrimentu povu nia ne’ebé hetan husi kobransa impostu nia ne’ebé maka’as no traballu forsadu. Ne’e hanesan motivu sira importante ba tentativa hasai portugés sira husi Timor ne’ebé hahú iha tinan 1719 ho aliansa ida Liurai sira timoroan nia hodi hasai portugés sira iha Timor.


Hahú momentu ne’ebá iha beibeik revolta sira iha teritóriu tomak. Tanba ne’e, tuir ha’u nia haree, tenki hatene loron aliansa ne’ebé estabelese entre Liurai sira Timor nia atu nune’e ita bele komemora hanesan loron importante ida iha Timor-Leste.

 

Revolta Manufahi

Revolta Manufahi D. Boaventura nia iha tinan 1911 mosu mós tanba fatór importante rua ne’e. Nia aman, tinan sanulu-resin-neen antes”, organiza revolta ida hasoru governu portugés iha tinan 1895 ho razaun sira ne’ebé hanesan. Funu ne’e lidera husi D. Boaventura ne’ebé dura tinan ida no halo ema mate hamutuk entre na’in 1500 to’o 2000, haktuir livru D. Ximens Belo nia ho títulu "Os Antigos Reinos de Timor-Leste”.

Revolta Manufahi nia iha dimensaun boot iha teritóriu Timor nia. Ita bele konsidera katak revolta D. Boaventura hanesan revolta boot ida iha Timor-Leste no simboliza konsiensializasaun ba identidade própriu ida timoroan nia, nasaun ida no povu ida livre no independente.

Ne’e hanesan inísiu movimentu anti-koloniál nia, intelektuál sira timoroan nia konsidera katak sira-nia luta ba independénsia hetan inspirasaun husi revolta D. Boaventura Manufahi nia. No hanesan atu simbóliku nia, sira hala’o enkontru ida ho D. Boaventura nia viúva.

 

Iha Tinan 1975

Iha tinan 1975, kuaze família reál sira Timor nia sofre tanba kolonizasaun portugés nia no hakohak movimentu anti-koloniál no sai hanesan membru sira Fretilin nia. Pelu menus, akontese hanesan ne’e iha reinu ha’u nia bei’ala sira, Funar, reinu ida ne’ebé konsidera revoltozu iha mapa revolta sira Portugal nia no iha tinan 1907 tropa portugés sira hakarak destrui reinu ne’e. Ha’u nia família, husi ha’u nia aman no mós ha’u nia inan, tanba iha ema ida iha família, D. João da Cruz, kastigu iha Ataúro no halo parte iha Fretilin, hanesan mós família D. Boaventura nia.

Iha sentidu ne’e, ha’u hakarak halo omenajen ba D. João da Cruz, Liurai Funar nia husi Uma Fukun Manehi’ak nia ne’ebé hetan kastigu iha Ataúro. Ha’u nia tiu sira, maun-alin ha’u nia inan nia maka hatene kona-bá razaun verdadeiru ba kapturasaun D. João da Cruz nia no mós nia kastigu iha illa Ataúro. Maibé lia-loos ida maka D. João da Cruz nia oan mane, ne’ebé hanesan ha’u nia bizavó nia primu, estuda iha koléjiu Lahane nia, lakon. Enkuantu D. Boaventura nia aman molok halo revolta, haruka na’ok nia oan mane, futuru D. Boaventura, husi koléjiu hanesan no lori ba reinu Manufahi nia, nune’e hetan protesaun husi vingansa sira revolta nia.

Ha’u hatene katak istória kolonizasaun portugés nia iha Timor iha revolta barak, traisaun, akuzasaun sira ne’ebé falsu, kaer no mate ne’ebé la favorese ba poder governu portugés nia. Maibé la bele haluha katak Portugal sempre halo nia dever hodi defende auto-determinasaun Timor-Leste nia. Ka Revolusaun Kravu nia ne’ebé lidera husi kapitaun sira ezérsitu portugés nia, iha ámbitu domíniu polítiku eskerda nia iha hanesan objetivu prinsipal ida maka auto-determinasaun povu kolonizadu sira.

Iha tinan 1975, prosesu auto-determinasaun iha Timor-Leste “interompe” ho invazaun Indonézia nia. Portugal, laiha demora, aprezenta kedas kazu Timor nia iha Asembleia Jeral Nasaun Unidu nia.

Nune’e rezisténsia timoroan nia iha bandeira diplomasia portugés nia lalatak iha mundu. Hodi reprezenta luta rezisténsia timoroan nia Portugal maka asina akordu 5 de Maio ho Indonézia ho intervensaun Nasaun Unidu nia.

Iha istória kolonizasaun nia, buat di’ak no buat ladún di’ak, hahú husi espíritu Deskobrimentu sira-nia ne’ebé mosu iha époka Renasimentu nia laran. La’ós atu haree lia-loos maibé atu konta de’it Istória. Ne’e hanesan tentativa ida hodi tau hamutuk pesa sira ne’ebé namkari iha realidade pasadu nia, iha tempu determinadu no espasu ida no nune’e ita hein katak bele aproveita ba buat di’ak iha loron ohin nia.
Ohin loron Timor-Leste livre no independente rezultadu husi ema hotu ne’ebé fó nia moris ba ita-nia país hodi halo hamriik Timor-Leste hanesan país ida hanesan ho nasaun seluk iha mundu.
Hatene onra asuwa’in sira no ema hotu ne’ebé luta ba Independênsia país nia hanesan buat ida ne’ebé murak husi sidadaun sira-nia no Estadu nia. Obrigadu


Bibliografia

Belo, Dom Carlos Filipe Ximenes Belo, SDB, Os Antigos Reinos de Timor-Leste, Reys de Lorosay e Reys de Lorothoba, Coronéis e Datos, Edição Tipografia Diocesana Baucau, 2011.
Marques, A. H. de Oliveira, História dos Portugueses no Extremo Oriente, Fundação Oriente, 3º volume.
PELISSER, René, Timor em Guerra. A Conquista Portuguesa 1847-1913, Editorial Estampa, Lisboa, 2007.
Internet
http://revistaestudospoliticos.com/timor-leste-dez-anos-depois-da-independencia-entrevista-com-ramos-horta-por-cristina-buarque-de-hollanda/