Prezidente Repúblika Taur Matan Ruak kondekora Medalla Póstumu Ordem D.Boaventura ba heroi boot Nicolau Lobato (1946-1978)


Prezidente Repúblika Taur Matan Ruak insígna medalla ho títulu Póstumu no Ordem Dom.Boaventura nian ba heroi boot Saudozu Nicolau Lobato, liu hosi serimonia komemorasaun tinan 100 revolta D.Boaventura no tinan 37 Proklamasaun Independênsia, loron 28 fulan Novembru, Kuarta feira ne’e iha Luak, sub-distritu Same, distritu Manufahi, ne’ebé mak reprezenta hosi nia oan mane Jose Lobato.


Kondekorasaun Ordem D.Boa Ventura nian ba saudozu Nicolau Lobato hanesan rekoñesementu no homenajen Estadu Timor-Leste nian ba lideransa no inspirasaun luta Nicolau Lobato nian hasoru okupasaun ilegal Indonezia to’o hisik nia ran hodi mate iha battala iha loron 31 Dezembru 1978.
“Kondekorasaun ba saudozu Nicolau Lobato ho títulu Póstumu i Ordem Dom.Boaventura nu’udar homenajen ba ninia lideransa no inspirasaun ne’ebé nia reprezenta ba jerasaun ita hotu nian no sira ne’ebé sei tuir mai iha loron ikus”, dehan Xefe Estadu iha nia deskursu.


Asiste serimonia kondekorasaun ne’e mak hanesan konvidadu de honra Prezidente Cabo Verde, Ministru Transporte Mosambique, Primeiru Ministru Xanana Gusmão ho nia membru governu, Prezidente Parlamentu Nasional, korpus diplomatiku, komunidade no bainaka importante sira seluk.

 

Fonte: Presidência da República de Timor-Leste